mirrorNepal.com

काठमाडौं, माघ २४ । नेपाली कांग्रेस विवाद समितिको आईतबार बसेको बैठक विना निश्कर्ष टुङगिएको छ । कांग्रेस पार्टी कार्यालय सानेपामा बसेको समितिको बैठकबाट जिल्लामा भएका समानान्तर समितिलाई मिनाउन नसकेपछि बैठक विना निश्कर्ष टुङगिएको हो ।

समितिका सदस्य फरमुल्ला मनसुरले भोलिसम्म जिल्लाको विवाद मिलाएर मंगलबार बस्ने केन्द्रिय कार्य समितिको बैठकमा जानकारी गर्राईने बताउनुभयो । समिति सदस्य मनसुरले महाधिवेशनलाई केन्द्रित गरेर बाँकी रहेका १४ जिल्लाको विवाद मिलाउन भरमजदूर प्रयास गरिरहेको बताउनुभयो । कांग्रेस एकीकरणको लामो समय बितिसक्दा समेत देशभरका १४ जिल्लामा अझै विवाद कायम रहेको छ ।

पार्टी कार्यालयले ओखलढुङगा, रामेछाप, सोलुखुम्बु, संखुवासभा, मुस्ताङ, पर्वत, कैलाली, नुवाकोट, काभ्रे, धनुषा, बारा, पर्सा, प्युठान, सप्तरीमा कांग्रेस विवाद कायम रहेको जनाएका छन् । पार्टी केन्द्रिय सदस्यको उपस्थितीमा जिल्लाका नेता तथा कार्यकर्तालाई स्थानीय स्तरको विवाद टुङगो लगाउन नसकेपछि प्रकाशमान सिंहको संयोजकत्वमा विवाद समिति गठन गरिएको थियो ।

संमितिले जिल्लाको विवाद सुल्झाउन नसकेको पछि विवाद समितिको बैठक पटक पटक बसेपनि विवादलाई टुङगो लगाउन सकेको छैन । कांग्रेसले माघ पहिलो हप्ता भित्रमा विवाद समाधान गर्न समितिलाई निर्देशन दिएको थियो ।

तर जिल्लाका समानान्तर समितिलाई मिनाउन नसकेपछि तोकिएको समय विवाद सुल्झाउन नसकेपछि आईतबार पुन विवाद समितिको बैठक बसेको थियो ।

जिल्लाको विवाद टुङगो लगाउन नसक्दा कांग्रेसले क्रियाशील सदस्यता वितरणमा समेत ढिलाई भएको छ । कांग्रेस महासमितिले माघ १५ भित्रमा सबै जिल्लामा क्रियाशील सदस्यता वितरण गरिसक्नुपर्ने तोकेको थियो । तर सबै जिल्लामा क्रियाशील सदस्यता नै बाँड्न नसकेपछि कंग्रेसले महाधिवेशनको तयारीमा समेत ढिलाई भएको बताएको छ ।